Útkall Rauður F1, leit að týndu barni

Eyþór Fannberg skrifaði þann 07. febrúar 2010 21:13

Fyrir stuttu voru hundateymi HSG kölluð út til leitar að týndu barni í Reykjanesbæ. 4 hundateymi gerðu sig klár auk bílstjóra. Áður en teymin lögðu af stað úr húsi var aðgerðin sett í bið og afturkölluð stuttu síðar þar sem barnið var komið í leitirnar.

Útkall Rauður - Fólk í sprungu á Langjökli

Björn Bergmann Þorvaldsson skrifaði þann 30. janúar 2010 15:13

Sveitin sendi 4 björgunarmenn á sleðum kl. 14:18 þegar tilkynning barst um að tvær manneskjur hefðu fallið í sprungu á Langjökli vestanverðum. Kona sem féll í sprunguna, sem var um 20 metra djúp, var látin þegar björgunarmenn komu að henni, en sjö ára sonur hennar, sem einnig féll ofan í sprunguna, var með meðvitund þegar komið var að honum. Drengurinn var fluttur á Landspítlann þar sem hann fór í aðgerð. Konan og drengurinn voru í jeppaferð ásamt hópi fólks á vestanverðum Langjökli.

Útkall Gulur - Leit í Hvalfjarðarbotni

Björn Bergmann Þorvaldsson skrifaði þann 22. janúar 2010 20:57

Sveitin var kölluð út kl. 9:25 vegna leitar í Hvalfjarðarbotni að karlmanni á fertugsaldri sem saknað var. 13 björgunarmenn sveitarinnar ásamt 3 hundum tóku þátt í umfangsmikilli leit á 6 farartækjum, bílum, fjórhjólum og bát. Maðurinn fannst látinn um kl. 16:30.

Fyrsti sveitarfundur 2010.

Hörður Már Harðarson skrifaði þann 05. janúar 2010 13:34

Fyrsti fundur árið 2010 verður í kvöld þriðjudaginn 05. janúar kl 20:00 í Jötunheimum. Fundurinn verður með hefðbundnu sniði. Farið verður yfir fjáraflanir í desember og starfið framundan. Vonast stjórn eftir að sjá sem flesta. 

Útkall, hundur í sprungu.

Hörður Már Harðarson skrifaði þann 03. janúar 2010 18:06

Félagar HSG voru kallaðir út til aðstoðar  í Heiðmörk þar  sem göngufólk hafði misst  hund í sprungu. Fjórir félagar fóru til aðstoðar, tveir undafarar, bílstjóri og eitt fjórhjól. Björgun hundsins tókst vel en hann hafið fallið niður í um fimm metra djúpa sprungu. Hundurinn var feginn björguninni og virtist ekki hafa orðið meint af fallinu.

Gleðilegt ár

Elvar Jónsson skrifaði þann 01. janúar 2010 17:11

Hjálparsveit skáta Garðabæ óskar Garðbæingum og öðrum landsmönnum gleðilegs árs og þakkar stuðninginn á síðasta ári