Útkall Gulur - Leit að manni í Flekkudal á Fellsströnd

Björn Bergmann Þorvaldsson skrifaði þann 24. júlí 2010 03:03

Hundateymi sveitarinnar voru kölluð út kl. 3:03 vegna manns sem saknað var í Flekkudal á Fellsströnd. Eitt hundateymi ásamt hópstjóra hundateyma og bílstjóra fóru til leitar. Maðurinn fannst um það bil sem þeir voru að hefja leit ásamt 4 öðrum hundateymum og sveitum af svæðum 4, 6, 7, og 8. Um var að ræða fyrsta hundaútkall sveitarinnar þar sem notast var við nýtt leitarskipulag sem byggir á notkun GPS-tækja.

Útkall Gulur - Leit að konu á Leggjabrjóti

Björn Bergmann Þorvaldsson skrifaði þann 22. júlí 2010 14:59

Sveitin var kölluð út kl. 14:59 vegna leitar að konu sem datt af hestbaki á Leggjabrjóti. 6 björgunarmenn á bíl og fjórhjóli fóru til leitar, en leitin var afturkölluð þegar þyrla landhelgisgæslunar fann konuna og kom henni til hjálpar.

Hundaflokkur á útkallsæfingu

Björn Bergmann Þorvaldsson skrifaði þann 12. júlí 2010 22:00

Hundaflokkur tók þátt útkallsæfingu Björgunarhundasveitar Íslands sunnudaginn 11. júlí síðastliðinn. Markmið æfingarinnar var að æfa nýtt leitarskipulag sem byggir á notkun GPS-tækja. 3 teymi sveitarinnar tóku þátt í æfingunni sem fram fór í Flókadal í Borgarfirði, en einnig tóku Gréta og Salbjörg frá Skátafélaginu Vífli að sér hlutverk týndra á æfingunni. Leitarsvæði voru afmörkuð með ferlum í MapSource og var stærð þeirra frá því að vera 0,4 ferkílómetar til 0,8 ferkílómetrar. Hvert teymi leitaði síðan 2 svæði, en gert var ráð fyrir því að leitartími yrði rúmir 4 klukkutímar, sem stóðst í meginatriðum. Allir punktar og ferlar voru fluttir úr MapSource í Sitewatch (Tetra), þannig gat æfingastjórn birt ákveðin leitarsvæði í Sitewatch og fylgst með leitinni. Að leit lokinni var farið yfir framkvæmd æfingarinnar og ferlum leitarmanna hlaðið af GPS-tækjunum, en leitarmenn fengu skrá með ferlum allra leitarmanna, ásamt skráningum æfingastjórnar, og gátu þannig lagt mat á eigin frammistöðu. Þetta leitarskipulag hefur verið æft í sumar með það að markmiði að taka það í notkun í útköllum með haustinu. Æfingin staðfesti enn og aftur að þetta skipulag hentar mjög vel til að stjórna og skipuleggja leitir þannig að leitarteymi nýtist betur. Næsta útkallsæfing er ráðgerð í ágúst.

Útkall Gulur - Innanbæjarleit í Reykjavík

Páll Viggósson skrifaði þann 10. júlí 2010 14:04

Sveitin var kölluð út núna um kl.12:30 til leitar innanbæjar í Reykjavík. Um 20 mínútum síðar voru farin úr húsi 9 manns. Þar af eru tvö hundateymi. Leitað er akandi, gangandi og á reiðhjólum.

Sveitaferð á Hrútfjallstinda

Elvar Jónsson skrifaði þann 29. júní 2010 19:30

Þann 26. júní sl. gengu nokkrir félagar út sveitinni á Hrútfjallstinda, Hrútfjallstindar eru 4 talsins; Hátindur, Miðtindur, Suðurtindur og Vesturtindur. Við gengum á Hátind (1.875 m). Lagt var af stað á föstudeginum inn í Skaftafell um kaffitímaleytið. Þegar í Skaftafell var komið fóru menn strax að gera sig klára fyrir gönguna, tjölduðu tjöldunum og lögðu sig aðeins en reima átti á sig gönguskóna klukkan 01:00 laugardagsmorguninn og leggja af stað stuttu síðar. Við hófum gönguna með því að ganga meðfram Illuklettum og svo upp með Hafrafellinu og lék veðrið við okkur allan tímann. Þegar við hófum gönguna var mikil þoka, mjög stillt veður og fremur hlýtt og þegar við náðum 450 metrunum þá gengum við upp úr þokunni og var veðrið fullkomið til göngu það sem eftir var, greinilegt að við erum í góðvild hjá veðurguðunum! Gangan gekk mjög vel í heildina en við áttum góð stopp á leiðinni þar sem að útsýnið var ekki amalegt en leiðin býður upp á stórbrotið útsýni yfir Öræfajökul. Þegar við vorum komin upp úr Sveltiskarðinu og að jökuljaðrinum eða í 1.350 m hæð var kominn tími til að fara í línu og svo gengum við meðfram Vesturtindi og þurftum við að þvera örfáar sprungur á leiðinni en annars var jökullinn mjög fínn. Rétt áður en við toppuðum hæsta tindinn skelltum við á okkur broddum og gengum svo af stað. Það tók okkur um 7 og hálfan tíma að komast á toppinn og var árangrinum fagnað með köku á toppnum í boði Berglindar. Veðrið var ljúft eins og áður var tekið fram og því lá okkur ekkert á að komast niður og sleiktum því sólina og virtum fyrir okkur þetta frábæra útsýni heillengi. Eftir þessa skemmtilegu göngu var svo skellt sér í sund og svo var komið að rúsínunni í pylsuendanum eða grillveislu um kvöldið og sofnuðu allir sáttir, saddir og vel útiteknir um kvöldið. Á sunnudeginum var haldið í bæinn um hádegi eftir frábæra ferð með flottustu farastjórn landsins: Edda Björk, Eiríkur E og Eiríkur F og að sjálfsögðu voru allir á sama máli um að leikurinn yrði endurtekinn á næsta ári, sami tími en annar tindur. Sjáumst þar kæru HSGfélagar! Rakel Ósk Snorradóttir.